Orain dela astebete iragarri genizuen Meta! mikromezenasgoko azken deialdia jarri genuela abian, Gipuzkoako Foru Aldundiaren laguntzarekin bultzatutakoa, zeinak ureztatze-kapitaleko 70.000 euro jarriko dituen 20 crowfunding kanpainen barruan jasoko den diru kopurua biderkatzeko, betiere gizarte zibilak garatuko dituen kultura izaerako proiektuei lotuta daudenean. Itxura ona du, ez? :)

Adi ba! Oraindik gehiago dago…

 

Lanaren lehen fasea: Edizioa, prestakuntza eta proposamenak bidaltzea

Joan den astean esan genizuen bezala, Meta! egitasmoaren lehen fasean gaude.

Baina, adi!: hau etapa eta prozedura berezia da. Diru laguntzen ohiko prozesuetan ez bezala, Goteo plataformaren barruan proposamenak bidaltzeko inprimakia lan inprimaki bat da, eta horrek esan nahi du toki horretan zuen proiektua editatu eta formulatu ahal izango duzuela pixkanaka; gainera, Goteoko kanpaina taldearen feedback-a izango duzue eta, horrela, inprimakiarekin batera proiektua bidaltzen duzuenean, zuen ekimenak aukera gehiago izan dezake aukeratua izateko, betiere Meta! egitasmoaren oinarrietan zehaztutako balorazio irizpideen arabera.

Horregatik, komenigarria izango litzateke erabiltzaile batek izena ematea Goteo plataforman eta proiektuaren lehen zirriborroa lehenbailehen egitea. Prozedura hau hasi ondoren, gure sistemak jarraitu beharreko urratsen berri emango dizue; horrela, zuen ekimenari buruzko informazioa jasotzeko eremuak bete beharko dituzue, eta, aldi berean, informazio horren bidez, Goteon zuen kanpaina izango litzatekeen zirriborro bat konfiguratuko da, ekainaren 19ra arte landu ahal izango dena; horrela, deialdi honetako Aholku Batzordeak ebaluatuko du ekimen hori, proposamenen azken hautaketa egite aldera.

 

Crowdfunding-eko tailerrak: edukia, tokia eta ordutegia

                                         

Kontuan hartuta atal hau lanaren lehen fasea dela, Goteok eta Gipuzkoako Foru Aldundiak crowdfunding-eko aurrez aurreko bi prestakuntza tailer eskainiko dituzte, alde batetik, laguntza emateko zuen proposamenak prestatu eta bidaltzeko prozesuan, eta, bestetik, prozesu horretan puntuazio ona lortzeko eta crowdfunding kanpainara irailean aurkeztu ahal izateko behar duzuen feedback-a emateko.

Egingo diren prestakuntza tailerretan parte hartzeko bi aukera daude: bat Donostian, beste bat Eibarren. Bi tailerrak berdinak dira. Joatekotan aukera ezazue gehien komeni zaizuena.

Tailer bakoitzak (8 ordu) prestakuntza osagarriko bi saio izango ditu, bakoitza 4 ordukoa, arratsaldeko ordutegian. Prestakuntza saio horien xedea da crowdfunding kanpainak prestatzea Goteo plataforman, dinamika parte-hartzaileak, kasu arrakastatsuak eta feedback kolektiboa erabilita. Goteo plataformako taldeak lan egingo du 8 ordutan aurkeztu daitezkeen proposamenen sustatzaileekin, oinarria, ideiak eta feedback-a emateko beraien kanpainak zehazteko eta, ondorioz, tailerrean ikasitako guztia Meta! egitasmora aurkeztutako proposamenetan aplikatu ahal izateko.

Tailerretan parte hartzeko izena eman behar da aldez aurretik; guztira, 40 pertsona eta 20 proiektu hartuko dira. Proiektu bakoitzeko 2 pertsona joan daitezke gehienez.

Tailer bakoitzaren lehen saioa publikoa eta teorikoa izango da, ordu bat eta berrogeita hamar minutukoa, eta ez da aldez aurretik izena eman beharrik; saio horretan mikromezenasgoaren gaineko oinarrizko kontzeptuak azalduko dira online plataforman eta, halaber, crowdfundig-aren historia eta aurrekariak eta Goteo.org-en kanpainen arrakastaren gakoak erakutsiko dira, betiere Meta! egitasmoaren deialdiaren testuinguruan kokatuta. Ondoren, zati praktikoarekin jarraituko da eta, bertan, aldez aurretik izena eman dutenek bakarrik parte hartuko dute. Oso komenigarria izango litzateke zati praktikora doazen pertsonek zati teorikoan ere parte hartzea; izan ere, zati hori funtsezkoa eta osagarria da tailerreko helburuak behar bezala gauzatzeko.     

Maiatzaren 10ean eta 11n Tabakaleran (Donostia)

   

Prestakuntzako lehen tailerrak Gipuzkoako kultur ekosistemaren bi eragile aktiboren babesa izango du: Impact Hub Donostia eta Kutxa Kultur (Kutxa Fundazioa).

Bi entitate horiek ibilbide aberatsa dute Donostiako kultur proiektua sortzeko eta babesteko ahaleginetan, eta beren Tabakalerako egoitzan egingo da Meta! egitasmoaren lehen prestakuntza tailerra maiatzaren 10ean eta 11n, 16:00etatik 20:00etara (helbidea: Andre Zigarrogileen plaza, 1 -20012 Donostia).

Lehen tailer honetan parte hartzeko eman izena lotura honetan.  

Maiatzaren 31n eta ekainaren 1ean Biharrian Elkartean (Eibar)

Prestakuntzako bigarren tailerra Eibarren egingo da, Biharrian Elkartearen egoitzan, maiatzaren 31n eta ekainaren 1ean, 16:00etatik 20:00etara. (helbidea: Ubitxa Kalea, 16, 20600 Eibar, Gipuzkoa).

Biharrian Elkarteak Eibarko lantegi zahar bat eraberritu du beste enpresa eta kolektibo batzuekin batera, sorkuntzari eta lanari lotutako gune-tailer bat prestatzeko; gainera, baliagarri da herriko kultura programazioa dinamizatzeko.

Bigarren tailer honetan parte hartzeko eman izena lotura honetan.  

Ez da derrigorrezkoa prestakuntza tailer horietan parte hartzea, baina oso komenigarria da Meta! egitasmora aurkezteko proposamenen kalitatea eta bideragarritasuna hobetzeko, eta hautatuak izateko aukerak gehitzeko.

Edozein zalantza edo iruzkin izanez gero, idatzi helbide honetara: meta@goteo.org.   Laster arte!   :)