Urte osoa zain pasa ondoren, hemen dira! Hona hemen META! 2018 deialdian hautatuak izan diren 15 proiektu paregabeen izenak. Irailean ekingo diote kanpainari.

Gure lantaldeak aholkularitza sakon eta pertsonalizatua eskainiko die aurrerantzean, kanpainari ekin arte eta baita hasi ondoren ere. Kanpaina hasitakoan, herritarrek emandako euro bakoitzeko beste euro bat emango du Gipuzkoako Foru Aldundiak, lehen itzulian proiektu bakoitzeko 4.700 euroko mugara arte. Dakizuen moduan, 70.000 euroko diru poltsa bat dago proiektu horiek babesteko, eta aurtengoan berrikuntza bat ere izango da kanpainan zehar: pizgarriak biderkatu egin daitezke! 

Bien bitartean, datorren uztailaren 12an, hautatutako ekimenek komunikaziora bideratutako aurrez aurreko prestakuntza jasoko dute Donostian, komunikazioa giltzarria baita crowdfunding kanpaina batek arrakasta izan dezan, zer esanik ez matchfunding deialdi batez ari garelarik.




Zer berri aurten?

Gipuzkoan garatutako eta gauzatutako ekimenak ebaluatu eta hautatzeko garaian, kontuan hartu da ekimenen originaltasuna eta kalitatea, eragile ezberdinen arteko partaidetza eta lankidetza sustatzen ote duten, baina baita ere ekimenen zehaztasuna, aurrekontu baten eta garapeneko plan koherente baten bitartez. Era berean, paper garrantzitsua izan du talde sustatzailearen esperientziak eta dedikazioak, baita interes taldeen identifikazioak eta banakako sarien sormenak eta erreplikagarritasunak ere. 

Aurten berretsi egin da Gipuzkoako sortzaileek ikus-entzunezkoetan, antzerkian eta musikan duten interes handia, kultura inklusiboago, eskuragarriago eta solidarioago baten alde egiten duena, gainera. Umore eta dibertimendurik ez da falta, esku-hartze poetiko xelebreei edo formatu konbinaketei esker. Orobat ahotsa eman nahi zaie galzorian dauden istorioei eta errealitateei, edo gizartean hausnarketa sakona eskatzen duten indarkeria sexistaren eta sexu aniztasunaren moduko gaiei. Slowfashion, DIY eta maker kultura bezalako mugimenduek ere badute lekurik.

Hona hemen gure ekimen apartak:

  1. Rocky Horror Bang Bang Show. Zinema eta antzerkia ikuskizun berean, Donostiako Antzoki Zaharrean. Kultur ekitaldi parte hartzailea eta partekatua.
  2. Epikultur. Kultura inklusiborako bidean, programa honek proposatzen du epilepsia duten pertsonei kulturara iristeko eta kulturaz gozatzeko aukera ematea.
  3. Amalur: garapen jasangarrirako musika.Tokiko eragileekin batera 10 abesti original sortzeko proiektu bat da, Nazio Batuen Erakundeak 2030erako aurreikusitako garapen jasangarriko helburuetan inspiratuta.
  4. Bienvenidos. Desagertzeko zorian dauden espazioen bila, taldeko erakusketa honek eztabaidatu nahi ditu gure gizartearen identitate galera eta globalizazioaren ondorioak.
  5. Zinebai: Zine irisgarria euskaraz. Euskarazko zinema irisgarriaren lehen erakusketa zentzumen desgaitasuna duten pertsonentzat, asmo argi batekin: zinemak pertsona guztiak elkartzea.
  6. "Matxitxako" dokumentala. Matxitxako lurmuturreko 1937ko bataila epikoaren kontakizunaren bitartez, azaltzen du zer izan zen Euzkadiko Gudontzidia, eta bizirik dirauen azken kidearen bidez egiten du:    Juan Azkarateren bidez.
  7. Goazen Antzerkira. Umeentzako antzerki profesional ibiltariko kanpaina bat, 1.500 biztanletik beherako udalerrietako ikastetxeei zuzendua. Hemen ere badugu antzerkia!
  8. Käffka. Kamikaz Kolektiboak, Gehituren laguntzarekin, nerabeei zuzendutako euskarazko antzezlan lesbiko bat prestatuko du, emakumeen arteko amodioaren ikuspegi positiboa eta normalizatua eskaintzeko.
  9. Labore Eskola. Diseinuak lagun dezake ederragoa den eta esanahi gehiago duen mundu bat sortzen. Helburu horrekin, espazio bat ekipatu nahi da arropa eta bestelako ehun-gaiak sortzeko: 3R, DIY, Arts & Crafts eta askoz gehiago.
  10. Aztarnak - Huellas. Dokumental formatuko hausnarketa bat, gure bizitzako lehenengo urteek, baita umetoki barneko bizitzak ere, utzitako arrastoen inguruan. Ahaztutako leku horretara egindako bidaia pertsonal bat.
  11. Miles Along. Asmoa ez da artile merinoz egindako kamisetak ekoiztea bakarrik, baizik eta jasangarritasunean eta bidezko merkataritzan oinarritutako mikroekoizleen sare bat sortzea. Mailakagarria ez den ekoizpen helburua, jarduera duina eta arduratsua bermatzeko. Horri #slowfashion esaten zaio.
  12. Roman y Julieta. Shakespearek Romeo eta Julieta idatzi zuenean, bi gazteen sentimenduekiko gizarte intolerantziaz eta desegokikeriaz hitz egiten zigun. Eta zer gertatzen da amodio hori (eta gatazka hori) hirugarren adinean kokatzen badugu?
  13. Desde 1,50. Mugitzeko arazoak dituzten pertsonei aukera ematea eta beharrezkoak diren tresnak eskaintzea, argazkiak modu autonomoagoan ateratzeko. Ustezko urritasun fisikoak "zuzendu" beharrean, parte hartzea eta inklusioa optimizatzen lagunduko duten tresnak jartzea.
  14. "365 hilos de sororidad" dokumentalaren zabalkundea. Madejas contra la violencia sexista proiektuaren bigarren zatia, indarkeria sexistaren prebentzioa agerian jarri nahi duen kilometro askoko pieza artistikoa. Ikus-entzunezko lana zabaldu eta banatzeko garaia da!
  15. Genopharus sp. Ekintza parte hartzaile honek DNA aztarnak, denbora kapsulak eta faroak biltzen ditu, baina baita herentzian jasotakoaren eta gure ingurunearen aniztasuna eta ulermena bezalako balioak ere. 

Orain arte, META!  programak egi bihurtu ditu Gipuzkoako kultur esparruko 36 ekimen, Foru Aldundiaren (130.294 €) eta herritarren (180.073 €) ekarpenekin bultzatutako machfundingaren bidez; eta arrakasta globalaren ratioa % 97,2koa izan da.

Pozez zoratzen gaude lortutago emaitzengatik eta deialdi honen eragin sozialagatik, eta ildo berari eutsi nahi diogu, aurrerantzean ere Gipuzkoa leku ederrago eta jasangarriago bat izatea ahalbidetzen duten ekimenak sustatuz. Irrikaz gaude aurtengo proposamenak ezagutu eta babestu ditzazuen, baina irailaren 18ra arte itxaron beharko dugu horretarako. Egon adi, beraz, laster izango duzue eta haien berri! 

EGUNERAKETA 2018-07-25

Hasiera batean hautatutako ekimenetako batek atzera egin zuenez, itxaron zerrendan hurrengo puntuaziorik altuena zuenari eman diogu parte hartzeko aukera. Horrela, Genopharus sp. proiektua deialdiaren parte da orain eta kanpainan parte hartuko du gainerako proiektuekin batera. Datorren irailaren 18an ekingo diote kanpainari, aholkularitza pertsonalizatu eta dedikatua jaso ondoren.