Bai luzea egin dugun bidea

Matchfundingeko Meta! ekimenaren beste edizio bat dugu martxan, Gipuzkoako Foru Aldundiak bultzatuta eta Goteo fundazioaren laguntzaz. Aurtengoa laugarren edizioa da jada!

Hiru urte, egiazko proiektu bihurtu diren amets eta ideiez beteta; hazi eta sendotu diren ekimenak; bide berriak esperimentatu eta esploratu dituzten kolektiboak eta profesionalak. Arrakastaz finantzatu dira 49 proiektu, eta 454.227 € banatu dira. Horien ia % 44, gainera, Gipuzkoako Foru Aldundiak ipinitako matchfundingekoa da.

Hiru urte horietan zehar, besteak beste, hainbat ekimen bultzatu dira (adibidez, Donosskino, zine erakustaldi ibiltaria), Bardulia Nunquam Superata Gipuzkoako historiaren sintesia paperean eta era digitalean argitaratu da (hemen eta hemen ikus dezakezu), danborradaren omenezko La marcha de (San) Sebastián film laburra egin da (hemen ikus dezakezu), eta Txano eta Oskarren abenturak haurrentzako liburuen lehen bi aleak itzuli dira. Era berean, Amalur diskoa sortu, grabatu eta ekoitziko da, garapen iraunkorreko helburuak inspirazio iturri dituzten abestiz osatuta; Käffka euskarazko antzezlana egingo da, bi emakumeren arteko maitasun harreman positibo bati buruzkoa... Eta askoz adibide gehiago aipa genitzake.

Meta! ekimenaren azken edizioan, Aldundiak ipinitako matchfundingeko 70.000 €-ko poltsa erabat agortu zen; proiektu bakoitzeko bildu zen zenbatekoa areagotu egin zen aurreko urtearen aldean, 10.544,21 €-ra heldu baitzen; eta herritarren batez besteko ekarpen kopurua 103 izan zen proiektu bakoitzeko. Deialdia sendotu egin dela esan dezakegu, eta gero eta jende gehiagok ezagutzen ditu Meta! ekimenaren eragin positiboak.

Gainera, 2018an ere bai, gamifikazioa erabili genuen lehenbizikoz; pizgarri horren bidez, 1 € eta 1 € proportzioa aldatu egin zen une batzuetan, eta bider 2 egin beharrean, bider 3 egiten zen! Hemen azaldu genuen nolakoa izan zen. Pizgarri horri esker, 2018ko Meta! proiektuek 42.375 € lortu zituzten 24 orduan soilik, herritarren donazioak eta matchfundinga batuta. Ez dago gaizki, ezta?

Baina datuez gain, gehien inporta zaiguna Meta! egin duten pertsonen kontakizunak eta esperientziak dira. Esate baterako, Meta! ekimenaren bidez, Jon Polek lehen baino ikusgarritasun handiagoa lortu du bere proiekturako: La Extra de Verano de Bang Zinema. Hartara, bestela baino askoz jende gehiagorengana heldu da, eta taldea handitu eta sendotu egin da. “Bang Bang sortu zenean, gurea zen, eta orain, berriz, gure ikusleena da”, aitortu digu. “Bultzatu ditugun ekimenen artean, hau da interesgarri eta berritzaileenetako bat”, adierazi zuen Gipuzkoako Foru Aldundiko Denisek. Bestalde, Anak Guipúzcoa en tus ojos bultzatu zuen, dibertsitate funtzionala duten pertsonentzako programa teknologiko inklusibo bat. “Proiektu honekin, ikusgai egin ditugu gure elkartea (Apoyodravet), gaixotasuna, eta aisia inklusiboa”. Anaren esanetan, Meta! egiten ari zarena kontatzeko tresna on bat da, eta gainera, sekulako pizgarria du: donazioak bikoiztea; alegia, matchfundinga.

Baina... oraindik ez al dakizu zer den matchfundinga? Finantzatzeko formula erantzunkide bat da, publiko-pribatua, eta Goteon 2013tik gaurdaino gabiltza hura bultzatzen eta garatzen. Zehazki, herritarren ekarpenak ugaritzean datza, erakunde publiko edo pribatu batek ipintzen duen diru poltsa bati esker. Hementxe dituzu matchfundingak eta Meta! deialdiaren gisakoek dakartzaten alde on batzuk:

  1. Zure proiektua finantzatzea bestela baino errazagoa da: zure proiektua babesten duten herritarren ekarpenek finantzazio pribatua osatzen dute, eta ekarpen publikoak horren osagarri dira, matchfundingaren bitartez bikoiztu egiten baitira: 1 € = 2 €.
  2. Parte-hartzea sustatzen da: herritarrek eta eragile sozialek kultura proiektuetan eta politiketan parte hartzen dute.
  3. Zure proiektua probatu egiten da: crowdfundingari esker, ekimenak nolako babesa jasotzen duen ikus dezakezu, eta bitartean, zure komunitatea handitu eta indartu dezakezu.
  4. Legitimitatea denontzat: bi noranzkotan, gainera; batetik, baliabide publikoak banatzeko; eta bestetik, finantzatzen diren proiektuetarako.
  5. Bidean ikasi egiten duzu: kolaborazio eta sinergia berriak sortzen dira kanpainaren aurretik, kanpaina abian den bitartean, eta kanpainaren ondoren, eta ezagutza zein trebezia berriak eskuratzen dira.
  6. Gora gardentasuna!: Deialdiko datu eta estatistika guztiak irekiak dira, eta matchfundingaren bikoizketa denbora errealean gertatzen da.

Eta oraindik badugu bidea egiteko!

Edizio hau gaur abiaraziko da, apirilaren 25ean. Oraingoan ere Gipuzkoako eragileek eta kolektiboek bultzatu dituzten kulturaren esparruko 15 ekimen babestuko dira, eta horiez gain, baita nazioarteko lankidetzako ekimenak ere.

Hautatzen diren ekimenek gure taldearen aholkularitza jasoko dute, bai kanpainak abiarazi aurreko fasean bai ondoren. Ekimenei bidean emango zaien laguntzaren xedea proiektu bakoitzaren aurkezpena eta antolaketa hobetzea izango da. Aurreko edizioetako esperientzia ikusita, aholkularitza funtsezkoa da kanpainak arrakastatsuak izateko, are gehiago matchfundingeko deialdietan.

Kanpaina abian denean, herritarrek proiektuetan jartzen duten euro bakoitzeko, Gipuzkoako Foru Aldundiak beste euro bat jartzen du (eta batzuetan 2 € ere!); lehen txandan, proiektu bakoitzerako 4.700 € ere jar ditzake. Gipuzkoako Foru Aldundiak 70.000 € jartzen ditu guztira, eta hemen dauden oinarrietan zehazten da zer irizpideri eta zer mugari jarraituz banatuko diren. Parte hartzeko asmoa baduzu, arreta handiz irakurtzera animatzen zaitugu ;)

Eta hauxe META! egutegia da: 2019:

  • Apirilaren 25etik ekainaren 7ra bitarte: proiektuak jaso
  • Maiatzaren 15ean: crowdfundingari buruzko tailer irekia egin, doan
  • Ekainaren 26an: hautatutako proiektuen berri eman ofizialki
  • Irailaren 19an: hautatutako kanpainak abian jarri aldi berean
  • Urriaren 28an: lehen finantza txanda amaitu
  • Azaroaren 17an: bigarren txanda amaitu eta kanpainak itxi

Crowdfundingari buruzko tailer irekia

Aita Manuelen ipuinak proiektuko Gemak eta Idoiak esaten dute Meta! bide baten hasiera dela, baina... Erne! Amarenak ekimeneko Oihanek gogora ekarri digu “igerilekura salto egin aurretik ura badagoela ziurtatu behar dela”.

Hori dela eta, Meta! ekimenaren 2019ko edizioan aurkeztuko zarela argi-argi baduzu, edo finantzazioa behar duen ideia edo proiektu bat baduzu, crowdfundingari buruzko doako tailer irekira joatea gomendatzen dizugu. Gauzak prestatzea ona delako, eta bidean laguntzen badigute, hainbat hobe!

Tailerra maiatzaren 15ean izango da, 16etatik 20etara, Donostiako Santa Teresa komentuan. Saio horretan, herritarrek zure proiektua finantzatzeko eman dezaketen babesa nola sustatu ikusiko dugu, eta zure ideia ere landuko dugu. Crowdfundinga zer den eta gure eredua nolakoa den azalduko dizugu. Halaber, zure kanpaina nola prestatu jorratuko dugu, sariak eta mikromezenasak gogoan izanda, baina baita gizarte konpromisoa ere, hurbileko komunitatea baino harago joateko.

Plaza kopurua mugatua da; eman izena orain hemen.

Gipuzkoako errealitatean eragina izan nahi duten proposamen mordoa jasotzea espero dugu; proposamen berritzaileak, inklusiboak, eraldatzaileak, originalak, parte-hartzea sustatzen dutenak, kolaboratiboak, apurtzaileak... Denok dugu tokia Meta! ekimenean, helburua kultura egitea, sustatzea eta zaintzea bada ;)

Laster arte, Metatarrak!