Crowdfunding kanpaina bat antolatzen eta zure proiektua finantzatzen ikasi nahi duzu, harremanak izateko eta lankidetzan aritzeko modu berri bat planteatuz? Gaur, maiatzak 4 (asteazkena), Meta!Kulturaren 7. edizioa aurkezten dugu Gipuzkoan. Beste urte batez, Gipuzkoan finkatutako eragileek kultura arloan garatutako 15 ekimen berri laguntzen jarraitu nahi dugu. Finantzaketa deialdi honekin, ikasteaz gain, zu, zure komunitatea eta zure proiektua ere hazi egingo zarete.
Izena emateko epea maiatzaren 4ko 00:00etatik ekainaren 23ko 15:00etara izango da eta parte hartzera gonbidatuta zaude, bai banaka, bai zure elkarte, kooperatiba edo kolektiboarekin batera. Bereziki baloratuko dira ekimen berritzaileak, Gipuzkoako eragileen sustatze ahalmenari eragiteko eduki nabarmena dutenak.
2016an lehen deialdia egin zenetik, Gipuzkoako Foru Aldundiak bultzatu du META!Kultura, Goteo Fundazioaren lankidetzarekin. Proposamen horren originaltasuna eta eraginkortasuna matcfunding ideian oinarritzen da, hau da, herritarren ekarpen bakoitza erakunde batek babesten duen mikromezenasgoan.
Beste modu batera esanda, herritar batek Goteo web orrialdean proiektu bati ematen dion euro bakoitzeko, Aldundiak 1€ bat gehiago jarriko du. Aldundiak, kasu honetan, 4.700 euroko muga jarri du kanpaina bakoitzeko, eta deialdi horretara bideratutako zenbateko publikoaren poltsa, guztira, 70.000 eurokoa da.
Horrela, bada, herritarren irizpideari jarraituz, kanpainaren lehen 40 egunetan hautatutako 15 proiektuetako bakoitzak jasotzen duen laguntzaren arabera banatuko da poltsa hori.
Lehen 40 egun horiek igaro ondoren, proiektu batek edo hainbat proiektuk ez badute lortzen gutxieneko finantzaketa, proiektu horiek jasotako ekarpenak ez dira gauzatuko eta ekarpen horiei lotutako matchfundinga eskuragarri geratuko da gainerako META! proiektuetarako. Proiektu horiek, gainera, beste 20 eguneko bigarren txanda batean dirua biltzen jarraitu ahal izango dute, eta kasu horretan bakarrik gainditu ahal izango da Aldundiak proiektu bakoitzeko jarritako 4.700 euroko matchfundingeko muga.
Gauzak horrela, gogorarazi nahi dizuegu urte hauetan guztietan metatutako arrakastaren ehunekoa % 97koa izan dela; beraz, ohikoena da proiektu guztiek herritarren aintzatespena jasotzea, Gipuzkoako kultura sustatzeko eta indartzeko asmoz.
Zifra batzuk mahai gainean jartzearren, aurreko 6 deialdien baturan guztira 886.871€ bildu ditugu, eta horien % 44 Aldundiak jarri du. Proiektu arrakastatsu bakoitzeko batez beste 10.486 € bildu dira. PiztuMeta2021 deialdiari begirada bat bota diezaiokezu ideia bat egiteko!
PiztuMETA! proiektu kulturalak finantzatzeko deialdia baino askoz gehiago da: proiektu bakoitza bere komunitate potentzialarekin edo, proiektu ekintzaileagoak badira, merkatuarekin prestatzeko eta testatzeko aukera bat da. Balio erantsi hori ez da beste finantzaketa prozesuetan ikusten, crowdfunding edo mikromezenasgoan izan ezik. Bereziki, Goteo.org web orrialdean, non abiarazitako proiektu guztien zeregina gizartean eragitea baita, eta gure aholkulari, laguntzaile eta marketing taldearen babesa jasotzen baitute. Hasieratik zure eskura izango dituzu aurrez aurreko edo online bidezko prestakuntza osoa eta aholkularitza pertsonalizatuak. Babes hori da MetaKulturaren arrakastaren ehunekoa % 97koa izatearen arrazoi nagusia.
META! informazio eta prestakuntza tailerrak
Aukera paregabea dela uste dugu eta zure proiektua aurkeztea gustatuko litzaiguke. Pentsa dezakezunez, ehunka proiektu jasotzen ditugu, eta jakin ezazu oso garrantzitsua dela zure proposamena ondo azaltzea. Horretarako, PiztuMETA2022ko deialdira aurkeztekotan bazara, 2022eko maiatzaren 25ean eta ekainaren 8an streamingean antolatzen ditugun prestakuntza tailerretara joatea gomendatzen dizugu, eta data bakoitzeko estekaren bidez izena ematea.
Tailer horretan gai hauek landuko dira: crowdfundigaren oinarriak, nola garatu zabalkunde kanpaina bat zure proiektua finantzatzeko herritarren babesa lortze aldera, mikromezenasentzako pizgarri izango diren sariak zehaztea, eta itzulkin kolektiboen balioa zure hurbileko komunitatetik harago iristeko. Bertan beste proiektu batzuk ere ezagutuko dituzu, eta galderen txandan ohikoa da parte hartzaile guztiak aberasten dituzten ezagutzak eta jardunbide egokiak partekatzea. Informatu eta eman izena online tailerretan.
Laburpena
- Gipuzkoako eragileek garatutako 15 kultura proiektu hautatuko dira oinarrietan jasotako irizpideen arabera.
- Proiektuak maiatzaren 11ko 00:00etatik ekainaren 23ko 15:00etara aurkeztu ahal izango dira.
- Crowdfunding tailerra doakoa da eta herritarrentzat zabalik dago maiatzaren 26an eta ekainaren 10ean.
- Prozesu osoan zehar, hautatutako proiektuek crowdfundingean espezializatutako aholkulari taldearen laguntza izango dute eta baita aurten online egingo diren hainbat prestakuntza saio egiteko aukera ere.
La Guixeta 
