#Crowdsasunaren deialdi berria egin zenetik hilabete pasa denean, hautaketa-batzordeak maiatzaren 20an euren crowdfunding-kanpaina jakitera emango duten 5 proiektu hautatu ditu, tipologia oso desberdina duten 5 proiektu, hain zuzen ere. Denbora honetan, proposamenak jasotzeaz gain, hainbat trebakuntza-jarduera antolatu dira (aurkezpena, lantegiak, bideokonferentzia) eta jarduera hauetan, guztira, 110 pertsonek hartu dute parte.

 

Aurkeztu diren proposamenen maila eta kalitatea dela eta, aurten aukeraketa zaila izan da. Guztira 12 proiektu izan dira eta guztiei eskertu nahi diegu deialdian eta antolatutako trebakuntza-jardueretan parte hartu izana.
 

Open source teknologian oinarritutako prototipoen sorkuntzatik, osasun fisikoa eta emozionala lantzeko metodologiak garatu eta martxan jartzera edota gizartean, osasunaren esparruan gori dauden gaien inguruko sentsibilizazio edo trebakuntzara. Proiektuek itzulera kolektiboak proposatuko dituzte erantzukizunez eta jakintza irekia sustatuz (diseinua, metodologia, ikasketa…). Horrela, osasunaren eta bizitza-kalitatearen esparruan bestelako ekimenak sortzea bultzatuko da efektu areagotzailea lortuz. Jarraian, hautatutako proiektuen eta horien atzean dauden pertsonen edo erakundeen deskribapen laburra egingo dugu:

 

* Social Sound-en eskutik Babyduino: Arduinori esker garatutako interfaze fisikoa. Umetxoaren egoerari buruzko eta bere inguruko datuak jasotzen dituena eta, gainera, mugikor aplikazioa datuak monitorizatu eta denbora errealean erabakiak hartu ahal izateko.
 

* Aketza Sánchez eta Mikel Rotaetxeren eskutik GOAZENUP!: SUP (Stand Up Paddle) eta Yoga praktikatzearen onurak batuta, erreabilitazioa eta hobekuntza fisiko-emozionala landuko dituen metodo berritzaile baten garapena.

 

* Aurrera Atera-ren eskutik Tantaka Lagunduz: babes-etxeetako txakurren bidezko terapia erabiliz, mendekotasuna duten pertsonak zaintzeko boluntario-sare baten sorkuntza eta prestakuntza. Helburua da gutxietsita dauden pertsona hauei laguntza fisikoa eta emozionala emango dien sistema sortzea.

 

* Javier Bustamanteren eskutik The Open Shoes: ongizatea dakarten oinetako modularrak. Oinetakoaren zolak talkak xurgatzen ditu eta gorputzaren pisua oinazpi guztian zehar banatzen du. Kode irekia du eta edozein erabiltzaile gai izango da bere oinetakoak egiteko proiektuak garatuko dituen tutorialak jarraituta eta 3D inprimagailu baten laguntzaz.


* Munduko Medikuak erakundearen eskutik Konpromiso Bidaia: Euskadin gertatzen den emakumeen sexu-organoen ebaketari buruzko azterketa eta diagnostikoa. Arazo hau plazaratu nahi da eta era berean, arazoa pairatzen duen taldearekin harremanetan dauden osasun-eragileei informazioa eman nahi zaie: gaur egungo egoerari eta Euskadin bizi diren afrikarren artean praktika hau gutxitzeko protokoloari buruz.


Hautatuak izan ez diren proposamenak ere askotarikoak eta kalitate handikoak izan dira:

  • Arduino eta Android-en oinarritutako funtsezko tresneria medikoa.

  • Ahalmen urritasuna duten pertsonen garapenerako musika bidezko jarduera multisentsorialak.

  • Gizarte-kalteberatasun egoeran dauden pertsonak modu integralean laguntzeko entzute-zentroa.

  • Euskadin sendagaiak eskuratzeko dagoen zailtasunari buruzko ikus-entzunezko proiektu parte hartzailea.

  • Kirol-errendimenduaren hobekuntzan eta osasun emozionalean, emozionalitatean entrenatzeak izan dezakeen eraginari buruzko azterketa.

  • Epilepsia duten pertsonen eta haien ingurukoen bizitza-kalitatea hobetzeko baliagarri izango den gailu baten prototipoari buruzko azterketa eta garapena.

  • EAEko zaintzaileentzako eta euren senitartekoentzako laguntza eta aholkularitza zerbitzua.

  • Krisi ekonomikoa eta iraupen handiko langabezia pairatzen duten pertsonen aktibatze psikosozialerako lantegia.

  • Osasun mentalaren arloan lan egiten duten profesionalei zuzendutako jarduera-gida eta jarraibideak. Pazienteek eurek osatuak hezitzaile papera emanez, haien susperraldia bultzatzeko.

  • Hainbat produktuen bidezko elikadura beganoaren sustatzea.

  • Naturarekiko eragin-trukean oinarrituta, zaurgarritasun-egoeran dauden gazteei zuzendutako emozioak kudeatzeko programa.

  • Buruko gaitza duten pertsonen inguruko hausnarketa-prozesu baten lantzea eta zabalkundea. Pertsona hauek euren esperientzian oinarrituta, aditu gisa ahaldundu daitezen eta profesionalekin hitz egin dezaten.


Hautaketa-batzordean Innobasqueren Efisalud dinamikako adituek alde batetik, eta GoteoEuskadiko kideek bestetik, hartu dute parte eta hautaketa, oinarrietan jasotzen diren irizpideen arabera egin dute, besteak beste: proposamenaren bideragarritasun orokorra eta finantziazio-baliabide gisa crowdfundingak eskaintzen dituen aukeretara moldatzea; proiektuak 2.0 bitartekoei esker zabaltzeko duen gaitasuna eta enpatia; arazoa pairatzen duten elkarteen identifikazioa; itzulera kolektiboak aplikatzeko gaitasuna; originaltasun eta berrikuntza maila; ondorio eraldatzaileak; eragileen arteko elkarlana eta hautaketaren aniztasuna.

 

Hemendik aurrera, hautatutako proiektuek banakako aholkularitza izango dute kanpaina erakargarria eta arrakastatsua antolatzeko. Era berean, #Crowdsasuna lan-taldearen laguntzarekin, komunikazio-plana diseinatu eta martxan jarriko dute.


Zure interesa piztu duen edo dagoeneko hobekuntza fisiko edo emozionala eragin dizuten proiekturik aurkitu baduzu, adi maiatzaren 20an! Zure ekarpenak egin ahal izango dituzu, zabalkundean lagundu, zure sareen barrena odol-isuria barreiatu, proiektuarekin batera lan egin, etab.

 

Zorionak eta mila esker, modu batean zein bestean, #Crowdsasunaren lehen fase honetan parte hartu duzuen guztiei.