Espainia osoko erakunde eta entitateekin matchfunding-eko 8 esperientzia arrakastatsu izan ondoren, Gipuzkoako Foru Aldundiaren eskutik bederatzigarren aukera dakarkigu zuen proiektuen eragina eta finantzaketa biderkatzeko.

Gaurtik ekainaren 19ra arte, zabalik dago Meta! deialdiko proiektuak jasotzeko epea. Gipuzkoako Foru Aldundiak sustatutako deialdia da eta ureztatze-kapitaleko 70.000 euro xedatuko dira Gipuzkoako 20 kultur proiekturen finantzaketa babesteko. Proiektu horiek crowdfunding kanpainara aurkeztuko dira Goteo.org-en, 2016ko irailaren 15ean.

Nolako proiektuak nahi dira?

Deialdi honen xedea da gizarte zibil antolatuaren kultur ekimenen finantzaketa eta garapena sustatzea, betiere Gipuzkoan sortutako ekimenak badira eta bere ingurune lokalean, nazionalean edo nazioartekoan modu positiboan eragingo duen itzulera kolektiboa sorrarazi badezakete.

Adibidez, ekitaldi edo programa bat baduzu, kultur zerbitzu baten ekoizpena edo teknologia garapen bat sustatzen baduzu, eta crowdfunding kanpaina baten bidez finantzatu nahi baduzu, kanpaina proposamen bat bidal dezakezu inprimaki honen bidez. Ekainaren 19tik aurrera, Gipuzkoako Foru Aldundiko eta Goteo Fundazioko kideek osatutako Aholku Batzordeak ebaluatuko ditu jasotzen diren proposamen guztiak, deialdi honetako oinarrietan zehaztutako balorazio irizpideen arabera. Deialdian ere modu xehatuan irakurri ahal izango dituzu programan parte hartu ahal izateko baldintzak.

Zeintzuk dira egin beharreko urratsak?

  1. Sortu zure proiektua inprimaki honen bidez.
  2. Parte hartu Gipuzkoan, maiatzean, eskainiko ditugun prestakuntza lantegietako batean.
  3. Optimizatu zure kanpaina-zirriborroa prestakuntza lantegian ikasitakoarekin, zure proposamenak puntuaziorik altuena izan dezan.
  4. Bidali zure proposamena baloratzeko, inprimakiaren beraren bitartez, ekainaren 19a baino lehen eta … zorte on!

Prestakuntza lantegien egunei, deialdiaren aurkezpenari, ureztatze-kapitalaren funtzionamenduari buruzko informazio xehatua nahi baduzu, edo zerbait argitu nahi baduzu, deialdiaren orrialde ofizialean sar zaitezke, eta, aurreko informazio guztiaz gain, Goteo Fundazioarekin eta Gipuzkoako Foru Aldundiarekin harremanetan jartzeko modua ere aurkituko duzu, behar izanez gero.

2016ko maiatzaren 2an, goizeko 11:00etan, Gipuzkoako Foru Aldundiak eta Goteo Fundazioak deialdiaren aurkezpen ofiziala egingo dugu foru jauregian, Gipuzkoa plazan.

Zuen kultur proiektuak sustatzeko aukera hau aprobetxatu ahal izatea espero dugu, eta, bide batez, eskertuko genizueke ahalik eta zabalkunderik handiena ematea deialdi honi, interesaturik egon daitezkeen pertsona edo erakunde gehienengana iris dadin.

Eta, noski… aurrera jarraitzen dugu!