Joan den azaroaren 16an bukatu zen META! 2018 deialdiaren hirugarren edizioa; deialdi horretan elkartzen dira, alde batetik, finantzaketa kolektiboa edo crowdfunding-a, erakundeen babesarekin, zehazki, Gipuzkoako Foru Aldundiaren finantzaketarekin, eta, bestetik, matchfunding-a, herritarren ekarpenen bidez bultzatutakoa. Deialdi hori tresna erabilgarria da babesteko, erantzunkidetasunez, Gipuzkoako eragile eta kolektiboek antolatu eta sustatutako ekimen kulturalak, non aukeratutako proiektuetara bideratuta herritarrek emandako euro bakoitza biderkatu egiten den Aldundiak emandako kopuru baliokidearekin. Aholkularitza sakona eta crowdfunding eta komunikazioan espezializatutako bi prestakuntza presentzial jaso ondoren, irailaren 18an abian jarri ziren aukeratutako proiektuei buruzko kanpainak.

Eta ondoren azalduko dizugu nola joan zen… ⬇⬇⬇

Gustukoak ditugu zenbakiak

Guztira 60 eguneko kanpainak, 40 eta 20 eguneko bi zatitan banatuta, egin ondoren, hirugarren edizioa oso emaitza onarekin amaitu zen:

• Finantzatutako 15 proiektuetatik 14k arrakasta izan zuten (% 93,3ko arrakasta ratioa)
• Guztira 147.619 euro bildu ziren.
• Zenbateko horretatik % 47a matcfunding bidez eskuratutakoa.

Horrek esan nahi du Gipuzkoako Foru Aldundiak jarritako 70.000 euroko poltsa osoa agortu zela, edo beste modu batera esanda: kanpainan jarri ziren proiektuetarako estrategiak aurkitu zirela, eta funts hori ahalik eta gehien aprobetxatzeko behar diren ekintzak ezarri zirela. Eta datu gehiago: kanpainan zeuden proiektuek 1.087 donazio jaso dituzte guztira, eta batez besteko ekarpena uste genuena baino handiagoa izan da: 55,06 euro, Goteo plataformako batez besteko ekarpen orokorra 49,6 eurokoa denean. Arrakasta izan duten proiektuetarako eskatzen zen gutxieneko batez besteko zenbatekoa 7.750,21 euro zen, baina gero jasotako batez besteko kopurua 10.544,21 euro izan zen. Beste emaitza izugarri bat.

Hausnartu eta berritu ere egiten dugu.

Pertsona sustatzaileek hainbat ekintza egin dituzte proiektuak zabaltzeko; adibidez, sari bereziak diseinatu dituzte une zehatz batzuetan abian jartzeko (early birds), komunitatearen arreta erakartzeko, jakin-mina sortzeko, eta kamiseta hura edo pack berezi hura eskuratzeko nahia pizteko. Ekimen batzuek grafiko bereziak prestatu zituzten kanpainaren unearen arabera, hala nola, hirukoiztera bideratutako 24 orduetan, eta beste batzuek, berriz, zuzeneko bilaketak egin zituzten toki estrategikoetan eta ekitaldietan. Sustatzaile batzuek beren komunitate leial eta zintzoak hartu dituzte oinarritzat, eta beste batzuek, ordea, beste komunitate batzuen lankidetza eskatu dute.

Edizio honetan, gainera, gamifikazioa estreinatu genuen, dohaintzak sustatzeko baliabide bat: 24 orduko epe labur bat aktibatu zen eta kanpainan zeuden proiektuek, epe horretan, jasotako herritarren ekarpen guztiak bikoiztu beharrean, salbuespenez, hirukoiztu egiten ziren. Hemen kontatu genizuen eta ekintza horren emaitza harrigarriak azaldu genizkizuen, eta izugarri gustatuko litzaiguke beste deialdi batzuetan ere ekintza hori garatzen jarraitzea.

Zer ikasi dugu?

Kontuan hartuta orain gutxi amaitu den esperientzia, gehi matchfunding deialdiak izan dituzten META! egitasmoko 3 urteak eta Goteo sareko 5 urte globalak, oso interesgarria iruditzen zaigu kanpaina desberdinetan jasotako iradokizunak, alderdi sendoak eta alderdi kritikoak jasotzea eta ezagutzera ematea; izan ere, horrela, funtsezko elementu batzuk izango ditugu kanpainak arrakastaz finantzatzen laguntzeko, batez ere matchfunding-eko deialdi barruan daudenak.

• taldea: ideia askoko talde bat behar da, kanpainaren zereginak eta pisua banatzeko gai dena, eta sortzeko, neurtzeko, konponbideak aurkitzeko eta ekintzak birbideratzeko gaitasunak dituena.
• aholkularitza: Goteo taldeak sustatzaileei eskaintzen dizkien laguntza eta prestakuntza funtsezko elementutzat jotzen dira kanpaina batek arrakasta izateko, izan ere, errealitateaz jabetzen, zehazten eta aurreikusten laguntzen dute.
• komunikazioa: hedapena kanpaina aurretik pentsatu eta planifikatu behar da, ekimenaren edukia aldatu eta diseinatu ahal izateko kanalen, kanpainaren unearen, eta publiko objektiboaren arabera; halaber, garrantzitsua da ekintzak neurtzea eta beraien jarraipena egitea, eta behar bezala funtzionatzen ez duena birbideratzea.
• grafikoa: formala edo informala, dotorea edo dibertigarria, bat dator aurreko puntuarekin, eta asko zaindu beharreko alderdia da, Interneten dagoen eduki multzo ikaragarri horretan lagungarri delako arreta erakartzeko eta gaia dinamizatzeko.
• storytelling: kontaketak argia eta koherentea izan behar du; izan ere, mezuak eta hizkuntzak talde sustatzaile gisa kokatzen gaituzte eta, aldi berean, gure publiko objektiboa zehazten dute.
• komunitatea: argi eduki behar da zein den mobilizatu nahi dugun publiko objektiboa; halaber, kontuan hartu behar da proiektua gauzatzeko behar den diruaren % 20a edo 30a, gutxienez, gertueneko kontaktuen eskutik eta kanpainaren lehen astean jaso beharko litzatekeela.
• aurrekontua: errealista izan behar da, ez bakarrik proposatzen dituen kostuei dagokienez, baita ere talde sustatzailearen aukerei dagokienez. Hau da oinarrizko araua: koste handiagoek denbora eta maitasun gehiago behar dute hedapenerako eta sorkuntzarako.
• sariak: gure publiko objektiboen arabera diseinatu behar dira, oso argi edukita tresna interesgarria dela gertutik ezagutzen ez gaituzten pertsonak erakartzeko eta gure ekimenetan parte hartzera haiek bideratzeko.

Kultura biderkatzen eta erantzunkidetasuna sustatzen jarraitzen dugu, gizarte zibilaren eta erakundeen artean, hiri inklusiboagoak, begirunetsuagoak eta jasangarriagoak eraikitzeko, baliagarri izango direnak kulturari lotutako aukera dibertigarriak eta konprometituak eskaintzeko eta, horrela, pertsonak aberastu eta aukera berriak sortu ahal izateko.