Dagoeneko martxan! META! egitasmoaren aurtengo edizioko 14 kultur ekimenek euren finantzaketa kanpainak argitaratu berri dituzte, eta, orain, urriaren 28ko 23:59ra arteko epea dute diru bilketako gutxieneko helburuak betetzeko. Hori ezinbesteko urratsa da beren asmoak gauzatu ahal izateko eta, horrela, bigarren fasera igarotzeko, non beste 20 egun izango dituzten (2019ko azaroaren 17ko 23:59ra arte) dirua biltzen jarraitzeko eta, nahi izanez gero, beren aurrekontu optimoa lortzeko.
Aspalditik jarraipena egiten badiguzu, jakingo duzu oraingo hau Goteo Fundazioak Gipuzkoako Foru Aldundiaren lankidetzarekin bultzatzen duen deialdiaren 4. edizioa dela. META! egitasmoaren bidez, Foru Aldundiak 70.000 euroko diru poltsa bat jartzen du proiektuek mikromezenasgoko kanpainen bidez jasotzen dituzten herritarren dohaintzak osatzeko. Herritarrengandik jasotako euro bakoitzeko, Foru Aldundiak beste euro bat jartzen du, horrela ekarpenaren balioa biderkatu egiten da, erakunde publikoaren eta herritarren arteko erantzunkidetasuna sustatzen delako eta alderdi guztien legitimitatea sendotzen delako.
Gipuzkoako lurraldea eta bere kultur ehuna aberastu duten 49 proiektu finantzatu dira orain arte, sormena, berrikuntza, inklusioa eta baliabide berriak eskainiz. META! egitasmoaren aurreko edizioan jasotako finantzaketari esker, Zinebai: zinema euskaraz denon eskura proiektuak, adibidez, “Agur Etxebeste!” eta “Soinujolearen Semea” filmak audiodeskribatu ahal izan zituen euskaraz, zinema egokitu, irisgarri eta integratzailea eskaintzeko.
Lorpen horiek hondar ale zoragarriak dira, Gipuzkoa gizarte bizigarriagoa eta jasangarriagoa egiten laguntzen dutenak eta honako hau esatera bultzatzen gaituztenak: bai, META ideiak oso bestelakoak dira! Horregatik, Goteo Fundazioan beste finantzaketa kanpaina bat abian jarri dugu eta 14 ekimen hauetaz maitemintzera eta gaur bertan zure babesa ematera gonbidatzen zaitugu.

Jarraian azaltzen dizkizugu ekimen horien ideiak eta proposamenak:

  • Erretratu nomada: Gipuzkoa: argazki artxibo bat Gipuzkoako herri txikietako biztanleen erretratuekin, argazki estudio nomada baten bidez: La Bitxa izeneko auto-karabana. Argazkilari bikote honek argazkigintza gerturatu nahi du udalerri eta komunitate txikietara, erretratu horiek tokiko ondare eta ondare kolektibo izan daitezen, hartara aldarrikatzeko herri baten nortasuna partekatzea dela memoria betiko bizirik mantentzea.
  • Gipuzkoako memoria bakezalea: memoriaren artxibo bat sortzea, terrorismoaren eta indarkeriaren aurkako erreakzio baketsua biltzen duena. Bakearen borrokalarien kontaketa. Artxibo honek biltzen ditu Gipuzkoan lehen antolakuntza bakezaleak jaio zirenetik ETA amaitu arte bakearen alde lan egin zutenen elkarrizketak.
  • Errautsak hauspotzen: Urolako eskualdea ezaguna da trikitixaren sehaska izateagatik, dela afizio handia dagoelako musika horretara, dela trikitilari asko eman dituelako historian zehar. Proiektu honetan bildu eta transmititzen da 60/70eko hamarkadetan Urola eskualdean trikitixaren inguruan sortu zen kultura ondarea. Nabarmendu egingo du fenomeno hori eta kulturari nahiz euskarari egin dion ekarpena, dokumental bat, liburu bat eta trikitilarien bideografia bilduma bat argitaratuz.
  • «Plastic Family» komikia : Gipuzkoako eta Iparraldeko hondartzetan aurkitutako plastiko hondarrekin egin zen eta Donostiako eta Biarritzeko hondartzetan ikusgai egon zen «Plastic Family» instalazio artistikoaren ondoren, Panthalassa kolektiboak «Plastic Family» komikia sortu du, Aritz Trueba euskal ilustratzailearekin batera. Egunero itsasoan amaitzen duen hondakin piloaren berri eskoletan eta espazio publikoetan zabaltzen jarraitzeko, eta modu horretan, itsasoaz gozatzen jarraitzeko aukera izan dezagun, gure eguneroko ohituren inguruan kontzientzia sortzeko, konponbideak bilatzera animatzeko eta eredu onak emateko.
  • Izadi Eskola Librea: proiektu hau jaiotzen da Eskola Libre bat sortzeko asmoz, 3-12 urteko neska-mutikoei zuzendua, Donostialdean, erantzuna emateko egungo gauzen ordenarekin pozik ez dauden gurasoen eskaera gero eta handiagori. Aukera pedagogiko alternatibo bat bat-bateko ikasketa prozesua sustatzeko: prozesu abegitsu bat, ekologikoa eta euskararen transmisioa zaintzen duena kulturaren eta identitatearen altxor gisa.
  • There is someone behind: Asian dokumental bat grabatu zuten modaren industriak duen inpaktuaren inguruan. Orain, arropa marka jasangarri honek erabaki du zerbait egin behar duela eta nolabait ere aurre egin behar diela munduko bigarren industria kutsagarrienaren ondorioei. Horrela, Bangladeshen joskintza tailer sozial bat sortzea bururatu zitzaien, proiektu jasangarri bat sozialki, ingurumenari begira eta ekonomikoki.
  • Veggie Karmak barazki gazta bat sortzen du txakolinarekin : gastronomia natural eta osasuntsuko proiektu bat, Gipuzkoako txakolinarekin beratutako barazki gaztak sortzeko. Ekoizpen arduratsuko metodoekin egina, batez ere ekoizle txikien tokiko osagaiak erabiltzen dituzte. Hornitzaileek konpromisoa dute proiektu sozialetan eta ingurumenekoetan, eta hondakinen murrizketan.
  • Faster, Puxika! : izuzko film labur bat da, zeinak salatu nahi baitu «Glovo» eta antzeko enpresetako banatzaileen lan prekarietatea. «Slasher» generotik eta 80ko izuzko zinematik asko du lanak. Carpenter, Craven edo Argento dira inspirazio iturri. Hartara, generoko zinemaren aldarrikapen bat ere bada, erakusten baita salaketa soziala egiteko trakeskeriak eta gordinkeriak ere balio dutela.
  • Irun, historia erraldoia : irabazi asmorik gabeko kultura elkarte bat, tokiko kultura sustatzeko lan egiten duena. Orain bere erraldoi eta buruhandien konpartsa handitu nahi du, erraldoi gehiagorekin, ume gehiago sar daitezen. Irungo eta Euskal Herriko historia ezagutzera ematea eta iraunaraztea erraldoi eta buruhandien bidez, berdintasuna, begirunea eta adiskidetasuna landuz.
  • Kanideren Abenturak : itzultzea eta euskaraz argitaratzea Iñaki Sainz de Murietaren «Las aventuras de Kanide» historiaurreari buruzko gazte bildumaren bost bolumenak. Ilustrazioak Miguel Berzosarenak dira. Obra Gipuzkoan barrena gertatzen da. Ekain haitzuloa eta flyscha nabarmentzen dira.
  • M.A. Project - «Oinarrizkoaren bilaketa» : proiektuaren bigarren fasean, #slowfashion-eko marka honek arropa errazak sortuko ditu familiaren egunerokorako. Artile merinoz eginak, ehun jasangarriak batuz kontsumo arduratsu eta ingurumenarekiko abegitsu bat eta hazkuntza natural batekiko konpromiso soziala sustatzeko, familien garapenerako oinarri gisa.
  • GauGau estudioa : Lasarte-Oriako Zumaburu auzotik, proiektu honen helburua da espazio bat kudeatzea bertan erabiltzaileen sorkuntza garatzeko, edozein maila sozialeko pertsonak artera eta sorkuntza prozesuetara iristeko. Kanpaina honen helburu nagusia da 500 orduko ikastaroak banatzea, proiektuaren gertuko kolektiboek eta elkarteek finantzatuak, horrela herriko ehun sozial eta kulturalean integratzeko.
  • Kamerata EusKdivarius: Beethoven omenduz : Beethovenen omenaldi bat jaio zeneko 250. urteurrenean. Musikagilearen 9 sinfoniak joko dituzte Gipuzkoa osoan barrena. Kamerata EusKdivarius ganbera-orkestra bat da, inklusiboa, euskal musikariz osatua, pasioz beteta dauden gazte eta profesionalak biltzen dituena, eta musika klasikoa modernitatearekin eta teknologia berriekin lotzen dituena.
  • Pioren historiak: Pio Zegamako idazle bat da. Osasuna eta adina direla eta, Matia Fundazioaren zentro batean bizi da. Argitaratu ez diren kontaketa eta ipuin sorta bat dauka. Beraz, proiektu honen xedea da legatu hori editatu eta argitaratzea. Kultura, tradizioak eta tokiko historia ezagutzera ematea, baina inklusioa ere bai.

Edizio honi buruzko zenbait datu mamitsu

Deialdia joan den apirilaren 25ean egin zen eta proiektuak jasotzeko fasea zabalik egon zen ekainaren 7ra arte. Horrekin batera crowdfunding-ari buruzko tailer ireki eta doakoa eskaini zen euren proposamenak landu nahi zituzten pertsona eta kolektibo guztientzat. Aurtengo edizioan 38 proposamen aurkeztu ziren, horietatik % 60 emakumeek sustatutakoak, benetan poztekoa den datua! Aurkeztutako proposamenak ebaluatu eta puntuatu egin ziren oinarrietan jasotako irizpideen arabera, eta 15 aukeratu ziren, baina, ekimen horietako baten borondatezko baja dela eta, azkenean 14 atera ziren finantzaketa kanpainara. Goteo Fundazioaren aholkularitza taldea hautatutako proiektuei laguntzen egon da une oro, jendaurrean jarri aurretik kanpainen aurkezpena hobetzeko eta modu horretan finantzaketa arrakastatsua izateko aukerak areagotzeko. Proiektuen sustatzaileek ere aurrez aurreko tailer bat egiteko aukera izan zuten joan den uztailean, euren kanpainen komunikazioa lantzeko: estrategiak, zabalkundeko ekintzak eta bitarteko baliagarriak.

Hemen dituzu 2019ko edizioan kanpainan dauden 14 proiektuei buruzko zenbateko batzuk:

  • Eskatutako gutxieneko aurrekontu osoa: 109.704€
  • Eskatutako aurrekontu optimo osoa: 224.872€
  • Eskatutako gutxieneko aurrekontu osoaren batezbestekoa: 7.836€
  • Eskatutako aurrekontu optimo osoaren batezbestekoa: 16.062,3€

Hau da esan beharreko guztia, ezagutu eta lagundu itzazu!