Ikasi nahi al duzu zure proiektua finantzatzen harremanak izateko eta lankidetzan aritzeko modu berri bat planteatuz? Gaur, osteguna, ekainak 4, aurkezten dugu META! Kulturaren 5. edizioa Gipuzkoan. Aurten ere, Gipuzkoan finkatutako eragileek kultura esparruan garatutako 15 ekimen berri laguntzen jarraitu nahi dugu. Finantzaketa deialdi honekin, ikasteaz gain, zu, zure komunitatea eta zure proiektua ere hazi egingo zarete.
Izena emateko epea ekainaren 4an hasiko da, 00:00etan, eta uztailaren 16an amaituko da, 15:00etan, eta parte hartzera gonbidatuta zaude, bakarka zein zure elkarte, kooperatiba edo kolektiboarekin batera. Bereziki baloratuko dira ekimen berritzaileak eta Gipuzkoako eragileen sormena sustatzeko gaitasun handia dutenak.
Lehen deialdia egin zenetik, 2016an, Gipuzkoako Foru Aldundiak bultzatu du META!Kultura, Goteo Fundazioaren lankidetzarekin. Proposamen horren originaltasuna eta eraginkortasuna matchfunding ideian oinarritzen da, hau da, herritarren ekarpen bakoitza erakunde batek babesten duen mikromezenasgo mota batean.
Beste modu batera esanda, herritar batek Goteo web orrialdean proiektu bati ematen dion euro bakoitzeko, Aldundiak 1€ bat gehiago jarriko du. Aldundiak, kasu honetan, 4.700 euroko muga jarri du kanpaina bakoitzeko, eta deialdi honetara bideratutako zenbateko publikoaren poltsa, guztira, 70.000 eurokoa da.
Horrela, herritarren irizpideari jarraituz, diru poltsa hori hautatutako 15 proiektuetako bakoitzak kanpainaren lehenengo 40 egunetan jasotzen duen babesaren arabera banatuko da.
Lehen 40 egun horiek igaro ondoren, proiektu batek edo hainbat proiektuk ez badute lortzen gutxieneko finantzaketa, proiektu horiek jasotako ekarpenak ez dira gauzatuko eta ekarpen horiei lotutako matchfundinga eskuragarri geratuko da gainerako META! proiektuetarako. Proiektu horiek, gainera, beste 20 eguneko bigarren txanda batean dirua biltzen jarraitu ahal izango dute, eta kasu horretan bakarrik gainditu ahal izango da Aldundiak proiektu bakoitzeko jarritako 4.700 euroko matchfundingeko muga.
Gauzak horrela, gogorarazi nahi dizuegu urte hauetan guztietan metatutako arrakastaren ehunekoa % 97koa izan dela; beraz, ohiko araua da proiektu guztiek herritarren aintzatespena jasotzea, Gipuzkoako kultura sustatu eta indartzeko.
Zenbait zifra mahai gainean jartzearren, aurreko 4 deialdien baturan, guztira, 151.024€ bildu genituen; % 44 Aldundiak jarri zuen, eta iaz 10.486 € bildu ziren, batez beste, proiektu arrakastatsu bakoitzeko. Begirada bat eman diezaiokezu 2019ko Meta!Kultura deialdiari, ideia bat egiteko!
META!Kultura kultura proiektuak finantzatzeko deialdia baino askoz gehiago da: prestatzeko eta proiektu bakoitza bere komunitate potentzialarekin edo merkatuarekin testatzeko aukera bat da, proiektu ekintzaileagoen kasuan. Balio erantsi hori ez da beste finantzaketa-prozesuetan ikusten, crowdfunding edo mikromezenasgoan izan ezik. Bereziki, Goteo.org web orrialdean, non abiarazitako proiektu guztien zeregina gizarte eragina baita, eta gure aholkulari, laguntzaile eta marketing taldearen babesa jasotzen baitute. Hasieratik zure eskura izango dituzu, aurrez aurreko edo online bidezko prestakuntza osoa eta aholkularitza pertsonalizatuak. Babes hori da MetaKulturaren arrakastaren ehunekoa % 97koa izatearen arrazoi nagusia.
META! informazio eta prestakuntza tailerrak
Aukera paregabea dela uste dugu eta zure proiektua aurkeztea gustatuko litzaiguke. Pentsa dezakezunez, ehunka proiektu jasotzen ditugu, eta jakin ezazu oso garrantzitsua dela zure proposamena ondo azaltzea. Horretarako, META!2020 deialdira aurkezteko asmoa baduzu, biziki gomendatzen dizugu 2020ko ekainaren 23rako eta uztailaren 2rako antolatu dugun informazio tailerrera joatea. Streaming bidez egingo da esteka honen bidez.
Tailer horretan gai hauek landuko dira: crowdfundigaren oinarriak, nola garatu zabalkunde kanpaina bat zure proiektua finantzatzeko herritarren babesa lortze aldera, mikromezenentzako pizgarri izango diren sariak zehaztea, eta itzulkin kolektiboen balioa zure hurbileko komunitatetik harago iristeko. Bertan beste proiektu batzuk ere ezagutuko dituzu, eta galderen txandan ohikoa da parte hartzaile guztiak aberasten dituzten ezagutzak eta jardunbide egokiak partekatzea. Informatu zaitez eta eman zure izena online tailerrean hemen.
Laburpena
- Gipuzkoako eragileek garatutako 15 kultura proiektu hautatuko dira oinarrietan jasotako irizpideen arabera.
- Proiektuak ekainaren 4tik uztailaren 16ra bitartean aurkeztu daitezke
- Crowdfunding tailerra doakoa eta irekia izango da herritarrentzat ekainaren 23an eta uztailaren 2an, ebazpena jaso ondoren. Izen ematea: Meta!2020 Tailerra.
- Prozesu osoan zehar, hautatutako proiektuek crowdfundingean espezializatutako aholkulari taldearen laguntza izango dute eta baita aurten online egingo diren hainbat prestakuntza saio ere.
La Guixeta 
