Euskadin osasunaren inguruko proiektuentzako crowdfunding-deialdia Innobasque-tik.

Proiektuen deialdi publikoa: 2013ko ekainaren 3tik 30era (ebazpena uztailaren 15ean).
Hautaturiko 5 proiektuen crowdfunding kanpaina: 2013ko urriaren 1etik abenduaren 20ra.

Erabiltzen duzu bizikleta ohiko garraiobide gisa eta jarri nahi dituzu auzoan horiek uzteko leku seguruak? Probatu nahi duzu zeure herrian laguntza-eredu integratua gizarte-zerbitzu, osasun-laguntza eta borondatezko lana egiten duten erakundeekin? Baduzu osasun-arloko produktu edo zerbitzurik, pertsona talde baten bizi-kalitatea hobetu dezakeenik, eta prototipatu nahi duzu edo/eta kontzeptu-proba egin? Baduzu jendearen jarduera fisikoa bere eguneroko bizitzan dinamizatzeko ideia bat? Sustatu nahi duzu auzoko haurrek oinez joatea ikastetxera eta bide hori markatzeko seinaleak jarri nahi dituzu? Dirua bildu nahi duzu gaixotasun jakin baten ikerketa bultzatzeko? Dokumental bat produzitu nahi duzu euskal gizarteari eragiten dion osasun-gai bati buruz?...

Hori guztia eta askoz gehiago da bilatzen duguna eta gauzatzen lagundu nahi duguna CROWDSASUNAren bidez. Innobasque-ren apustua Euskadin, osasunaren eta bizimodu osasungarriaren arloan ekimen berritzaileak proposatu, sustatu eta modu kolektiboan finantzatzeko bide berriak aztertzeko, emaitzak era aske eta irekian erabiltzeko eta errepikatzeko aukera emango duten bide berriak, hain zuzen ere.

GoteoEuskadin gaikako deialdi asko egiteko asmoa dugu eta hau da lehena. Espero dugu guri bezain interesgarria irudituko zaizula. Horregatik ez dizugu denbora gehiago galarazi nahi. CROWDSASUNAren web-gunean sartu eta xehetasun guztien berri izango duzu.

Deialdia irekita dago ekainaren 30a bitartean, baina ez utzi azken egunerako, 5 proiektu baino ez ditugu aukeratuko, beraz arretaz eta xehe prestatu behar dira. ANIMO ETA ZORTE ON!