Pandemiak duela hilabete batzuk sekula imajinatuko ez genituen egoera asko sortu ditu. Baina egoera horiek sentimenduak dakartzate, eta, oro har, oso gogorrak izan dira. Gure kasuan, adineko pertsonei laguntzen diegu beren bizitzan, eta mina, banaketak, beldurrak, distantzia, segmentazioa... aurkitu ditugu, baina baita gainditzea, ikastea, erresilientzia... ere. Baina ekintzarako hilabeteak izan dira: egiteko, erabakiak hartzeko, betetzeko, aldatzeko, ziurgabetasunerako, gorabeheretarako..., eta ondorioz, ez da unerik izan norbanakoari entzuteko, adierazteko, patxadaz hitz egiteko, asimilatzeko, partekatzeko, aurkitzeko, ezagutzeko.
Entzun nahi dugu: familiak, gure zentroetan bizi diren adinekoak, langileak, boluntarioak, beste edozein egoeratan etorri diren laguntzaileak... Zer sentitu dugu? Zer ikasi dugu? Nola begiratzen diogu etorkizunari?
Guztion artean hausnartu eta sentitu nahi dugu, eta, hortik, edizio digital bat sortu, parte hartzen duen zentro bakoitzak adierazi nahi duen erara: idatzi bat, abesti bat, marraztu, komikia edo ipuin moduan… Gure esperientziatik abiatzen bada ere, emaitzean pertsona eta herritar asko ordezkatuta senti daitezen, eta langileak, zaintza-komunitatea, garai hauetan hain garrantzitsua den eta etorkizunerako eredu gisa aintzatetsita senti daitezen.
Oinarrizko ezaugarriak eta helburuak
Pandemiak oso bizipen gogorrak utzi dizkigu. Gure ahuleziarekin lotu gaitu, gure gizatasunarekin. Bizi izan dugu ziurgabetasunaren erdian egoteak dakarren beldurra, karga emozionala eta abar, eta guztia, Covid izeneko bidelagun ezezagun batekin, zeinak askatasuna, autonomia, kontaktua, ziurtasuna, kontrolaren pertzepzioa galtzea ekarri digun, bizitzaren beste aurpegiarekin, heriotzarekin, heriotza isil, bakarti, hur-hurrekoarekin aurre egiten digun, izaki mugatuak eta ahulak eta elkarren mendekoak garela gogorarazten digun.
Proiektuaren dinamika Matia Fundazioaren zentro/zerbitzu bakoitzean irekitako hausnarketa-taldeak egitea izango da. Horietan, langileek, egoiliarrek, senideek, boluntarioek, lankidetzan diharduten erakundeek, ikastetxeek, musika-zentroek parte har dezakete. Matia Fundazioko 16 zentro eta zerbitzutara zabaldu da taldeak sortzeko gonbidapen hau.
Topaketak dinamizatuko dituen pertsona bat beharko dugu, hausnarketa-talde bakoitzari bidean lagunduko diona, adierazpenerako bideak bilatuko dituena.
Eta topaketa horien ondoren, talde bakoitzak adierazpen artistiko bat sortuko du, nahi duena, nahi duen formatua eta digitalizatu daitekeena. Marrazki bat, kantu bat, poema bat, kontakizun bat, collage bat, arte librea.
Horiek guztiak multzokatuta, prozesu honen azken emaitza gisa, edizio digitala izango dugu, modu artistiko desberdinetan irudikatutako eta adierazitako esperientzien edizio digitala.
Edizio digital hau guztiontzat eskuragarri egongo da, ondare bat izango da, testigantza bat, bizi izandakoaren adierazpen kultural bat.
Bizipen horiek antzekoak izan daitezke pertsona askorentzat. Baina desberdinak ere beste askorentzat, eta enpatizatzen, ezagutzen eta beste pertsona batzuei beste modu batean begiratzen lagun dezake.
Helburuak:
• Bizi izandakotik kultura sortzea, kultura gizarte baten isla delako, eta horrelako egoera bat islatu egin behar delako.
• Adierazpen-kanal bat irekitzea, bizitako esperientziak finkatu eta sendatu ahal izateko.
• Eremu soziosanitarioko langileak aintzatestea, zainketen gizartea aintzatestea.
• Eragileen eta pertsonen arteko lankidetzatik eraikitzea: gure zentroetan bizi diren pertsonak, senideak, langileak, boluntarioak... eta talde-lanaz eta sorkuntzaz gozatzea.
Zerk bultzatzen zaitu eta zeini zuzenduta dago proiektua
Proiektu honetan, zehazki, gure inguruko pertsonek hartuko dute parte, baina ziur asko emaitzak sentituak eta partekatuak izan daitezke guztiontzat.
Matia Fundazioan laguntzen diegun pertsonak, langileak, senideak, boluntarioak, inguruko eragileak (musika-eragileak, hezkuntza-eragileak...).
Baina parte-hartzaile horiez gain, emaitza guztiontzat izango da: herritarrentzat, konfinamendua bizi izan dugunontzat, besteengan beldurra, albisteak, ziurgabetasuna, egoera ekonomikoa, etorkizun zalantzagarri eta aldakorra...
Artita bazara, zuri ere zuzendua dago, taldeetan eta adierazpen artistikoan lagun baitezakezu.
Horregatik, berriz diogu guztiek sortutakoa eta guztiontzako dela.
Aldez aurreko esperientzia eta taldea
Matia Fundazioa irabazi-asmorik gabeko erakunde pribatua da, eta 130 urteko ibilbidea darama. Zahartze-prozesuan laguntzen die pertsonei, haien ongizatea hobetzeko, haien autonomia eta duintasuna sustatzen duten ezagutza eta zerbitzu pertsonalizatuak sortuz.
MatiaZaleaketik helburu horrekin laguntzen diguten eragile eta pertsona guztien arteko sarea sortu nahi dugu, gizartean adineko pertsonen balioekiko sentsibilitatea sortu eta beharrak asetu.
Azken hiru urteotan hainbat ekimen egin ditugu, hemen ikus daitezkeenak.
Aurkezten dizuegun proiektu hau gauzatu ahal izateko, Matia Fundazioko lantaldea dugu, horrelako proiektuak dinamizatzen dituena, kanpainarako, komunikaziorako eta zabalkunderako, bai eta ondoren ere.
Beste alde batetik, Matia Fundazioan kultura garatzeko ardura duen pertsonak, beharrak hautematen, proiektua sortzen eta ondoren prozesua gainbegiratzen dihardutenak.
Eskerrak hemendik Hiruzta upategia, Donostia Kultura eta Ibon Martineri beraien kolaborazioagarik sarientzat.